EZPONDA ETXALDEKO
ARGAZKIAK
Behi gasna egiteko hainbat etapa errespetatu behar dira, gatzatzea, txortatzea, gazitzea, moldetan emaitea, tinkatza, ontzea.
Gasna ona egiteko, esne ona behar da.
BEHI GASNA ONDUA
TEKNOLOGIA : ESNE GORDINAREKIN, BETIKO GASNA PRENTSATUA
Maturazio hotza egiten dugu. Mezpera arratsean jeitsi esneari bakteria laktikoak gehitzen ditugu eta gau osoan 12°C gradutan atxikitzen dugu. Fase hortan, esnea bizi denez, flora ona garatzen da eta flora txarrari gaina hartzen deio. Goizean, esne freskoa gehitzen zaio.
Esnea 35°C gradotan berotzen dugu, eta ondotik gatzagia gehitzen da. Esnea gatzatzen da.
Oren bat berantago, esne kaillatua xehatzen artoaren heineko pikorrak ukan arte, berriz berotzen eta nahasten da oraino minuta batzuz. Ondotik kaillatua moldetan emaiten da.
Ondotik gasnak tinkatzen eta egunean bizpahiru aldiz itzultzen dira gaxura aterazteko.
Biharamunean, gasna moldetatik ateratzen dira eta gazitzen dira.
Gasnak izei taulen gainean ontzen dira, 8 astez bederen.
Gasnak erregularki itzuli eta garbitu behar dira. Ontze fase hontan bere zapore guzia hartzen du gasnak.
gasna freskoak
Teknologia : laktikoak
Gasna fresko laktikoak, gasna « pikorrak » deitzen dira ardura.
Behi jeistetik landa, esnea hozten da 20°C gradotarat, bakteria laktikoak gehitzen dira eta gatzagia emaiten. Ondotik esnea gatzatzen da.
Bakteriek ongi lan egin dutelarik, molde ttipiak kaillatuaz betetzen dira eztiki zali batekin.
Oihalezko zakuak ere betetzen dira gasna xuria egiteko.
GASNA XURIA
Gasna freskoa emeki txortatzen da oihalezko zaku batean, oren batez. Gasna ontzietan emaiten da, holo hola (kanpainako gasna xuria) edo irabiatuta (gasna xuri leuna).
gasna freskoa belarkiekin
Xortatuta, gasna freskoak moldetatik ateratzen dira, soilik jaten ahal dira edo belarkiekin prestatzen ahal dira (baratxuri eta tipulina, peresila eta tipula, Probentziako belarkiak, Ezpeletako biperra,…)
GASNA PIKORRAK
Gasna freskoak xortatuta, gasnaren aldi bat gazitzen da eta biharamunean bestea. Ondotik gasna egun batez edo biez idorrarazten da, eta gero ontzen utziko da egun guziz itzulikatuz. Gasna pikorrak krematsuak bilakatzen dira hamar bat egunen buruan.